چمك، هەولێر: پێشکەشکاری بەرنامەی شاراشۆ؛ داوای لێبوردنی لەدوو میوانی بەرنامەکەی کرد.
پاش ئەوەی لەچەند بەرنامەیەكی شاراشۆدا، شارا ئیبراهیم لەكەناڵی كوردماكس چەند پرسیارێكی ئاراستەی هەریەك لە گۆرانیبێژان زاهیر جەلال و عەباس سەڵاح داودە كرد، بەشێك لە بینەران و چاودێرانی میدیایی نیگەران كرد و شێوازی پرسیاركردنەكانیان بەدەرچوون لە رێسا پیشەییەكانی راگەیاندن ناوبرد. تەنانەت داوای ئەوە لە كەناڵی كوردماكس و خودی شارا ئیبراهیم كرا كە بەفەرمیی داوای لێبوردن بكەن و بگرە رووبەڕووی لێپێچینەوەی یاسایی بكرێن.
رۆژی پێنجشەممە (29ی تشرینی دووەمی 2018) لەچوارچێوەی بەرنامەیەكی نوێدا، شارا ئیبراهیم بەفەرمیی داوای لێبوردنی كرد و داوایكرد كە ئیتر كۆتایی بەو باسوخواسانە بهێنرێت كە لەسەر بەرنامەكەی دەكرێن. هاوكات روونیشیكردەوە كە هەمیشە پێویستیی بە رەخنە و سەرنجی بینەرەكانی هەیە، بەڵام بەدوور لە جوێن و ناوزڕاندنی.
