چمك، سلێمانی: بەپێی ئەنجامەكانی نوێترین توێژینەوەی میدیایی، كۆڤید_19و دەهاویشتەكانی خۆپاراستن لێی لەماوەی قەدەغەی هاتووچۆدا، كاریگەریی راستەوانەی لەسەر پەیوەندیی نێوان جوڵەی مرۆڤەكان و جوڵەی بازاڕی هەرێمی كوردستان هەبووە. ئەو كاریگەرییەش بەلای راگەیاندنكار و رۆژنامەوانانەوە زۆرتر بووە وەك لەلای هەریەك لەتەلەڤزیۆنە كوردییەكان و كۆمپانیاكانی بەرهەمهێنانی ریكلام.
لەدوایین توێژینەوەی هاوبەشی نێوانیاندا، هەریەك لە پ.ی.د.نەزاكەت حسێن سەعید لە زانكۆی سلێمانی، م.د.شوان ئادەم ئەیڤەس و م.ی.هەرێم كەریم غەفور لە زانكۆی پۆلیتەكنیكی سلێمانی، كاریان لەسەر دۆزینەوەی كاریگەرییە ئەرێنیی و نەرێنییەكانی كۆڤید_19 لەسەر ئاستی بەرهەمهێنان و بڵاوكردنەوەی ریكلام و داهاتی تەلەڤزیۆنە كوردییەكان كردووە، بەتایبەت لە سەروەختی بڵاوبوونەوەی جیهانیی پەتاكە و بڕیاری ناوخۆیی هەرێمی كوردستانی عێراق بۆ قەدەغەی هاتووچۆ.
بۆ ئەو ئامانجەش، پشت بە كۆكردنەوەی داتای پێویست و گرتنەبەری هەردوو رێبازی توێژینەوەی پەسنیی رووپێویی و چاوپێكەوتن بەستراوە. لەو چوارچێوەیەشدا، 98 راگەیاندنكار و رۆژنامەوان لەگەڵ چوار كۆمپانیای بەرهەمهێنانی ریكلام و سێ كەناڵی ئاسمانیی و زەمینیی كوردی، وەك مشتە و كۆمەڵی توێژینەوەكە وەرگیراون.
بەپێی ئەنجامە بەدەستهاتووەكانی توێژینەوەكەش، لەماوەی قەدەغەی هاتووچۆدا كۆڤید_19و دەهاویشتەكانی خۆپاراستن لێی، كاریگەرییە نەرێنییەكانی لەسەر ئاستی بەرهەمهێنانی پرۆژەی گەورەی ڤیدیۆیی هەریەك لە كۆمپانیاكانی “سولی میدیا، ئایدی میدیا، یونیك ئینجین و ستارت سەنتەر” هەبووە. هاوكات كاریگەریی لەسەر سەرچاوەكانی داهاتی ریكلامی كەناڵە زەمینییەكانی فاڵكۆن زیاتر و لەسەر كەناڵە ئاسمانییەكانی ئێن ئاڕ تیی و پەیام كەمتر بووە. ئەوەش پێچەوانەی بۆچوونی باوی زۆرینەی راگەیاندنكار و رۆژنامەوانانی كردەیی نێو میدیا جیاوازەكانە كە “هاوڕان” لەگەڵ ئەوەی كاریگەرییە نەرێنییەكانی پەتای كۆڤید_19و دەرهاویشتەكانی بەجۆرێكە، دەبێتە هەڕەشە لەسەر مانەوەو بەردەوامیی تەلەڤزیۆنە كوردییەكان
